|
Tuttığımız yol
1917. –
№ 1. – iyün 27.
Bugün, Qırım yarımadasınıñ
siyasiy merkezi olan Aqmescidde "Millet” namıle açmaya muvaffıq
oldığımız bayrağın üzerinde muhterem şair Fikretin şu
sözleri yazılmışdır: "Millet
yolı, haq yolıdır – tuttığımız yol!..”
İşte kerek bayrağımızın isminden ve kerek bayrağımız
üzerinde yazılmış şiarımızdan dahi añlaşılacağı üzere
"Millet” her şeyden ziyade millete, milliyete hıdmet itmeyi,
kendisine emel ve ğaye-i ittihaz eylemişdir. Binaenaleyh, millet
her şeyden evel umum Qırımtatarnıñ siyasiy, içtimaiy,
iqtisadiy, ilmiy ve edebiy hastalıqlarını, derdlerini açmaya,
bunların eyileşmesine careler, merhemler bulmaya milletimizin diger
milletlerden keri ve aşağı qalmamasına elinden keldigi qadar
çalışmaya qarar virmişdir.
"Millet” kendi milletiniñ
huquqını, menafini, namusını ve hatta müdafaa için nerde olursa
olsun, her zaman doğrıya doğrı, egriye egri dimekden
çekinmeyecek, milletine – kimin tarafından olursa olsun –
idilen haqsızlıqlara qarşu köküs kerecekdir. "Millet”çiler
"Millet”in açdığı millet ve haq yolundan zerre qadar
ayırılmayarlıq. Oğrayacaqları her dürlü müşkülâta,
küçliklere, manialara açıq alınları, pak niyetleri, temiz
vicdanlarıyle qarşu durub, haqlarında idilecek tarzlara haq
işleriyle cevab virecek. O yolın nihayetine varmaq için – icab
iderse, "ölüm var, ayırılıq yoq”, diye millet ve haq yolında
ölmeyi de kendisine büyük bir şan ve şeref add idecekdir.
Umum qırımtatarlarınıñ 25 martda
sayıldığı genç simalardan teşkil iden ve kendi milletiniñ
saadetine hıdmet idecegine iman ve kendi oğurlarında ölmeye bile
and itdigi fikirlerini halq arasına serpmek ve Qırımtatarnıñ
kendisine yükledigi ağır ve büyük vazifeyi haqqıyle icra
idebilmeyi boyunına alan Qırım müslimanları icra Komitesi
milleti keçmişimiz, halımız ve kelecegimizden haberdar itmek, onı
yaqında açılmasını bekledigimiz Devlet Qurultay Meclisine olacaq
intihablar, hazırlıqlar ve keçirmekde oldığımız siyasiy
fikirler ve ceryanlarle mümkün oldığı qadar tanış itmek
emeliyle bugün millete "Millet” namında bir gazeta taqdim
idiyur.
"Millet” matbaası ve gazetası
haqqında millete hitaban neşir idilmiş hitabnamede dahi yazıldığı
kibi Qırım İcra Komitesi siyasiy hayatda her şeyden evel tatar
milletiniñ saadetini temin, umum müslimanların huquqını müdafaa
itmeyi ve bunıñ için de Rusiyedeki hürriyet dostlarıyle el ele
virmeyi kendisine nasıl bir borc add itmiş ise, naşir efkârı
olan "Millet” gazetası de her şeyden muqaddem serbestlik
dostlarıyle beraber Rusiyedeki milletlerin saadetlerini temin iden,
hürriyetin yaşamasında ve hür Rusiyede yaşayan tatar milletiniñ,
milliy emelleriniñ dirilmesine, yaşamasına çalışacaq ve bütün
müslimanların şimdiye qadar kördikleri ve bundan soñra
körecekleri haqsızlıqlara, zulümlara qarşıda haqiqiy sada-yı
vicdaniyesini yükseldecekdir.
Qırım İcra Komitesi bu
maqsadlarına irişebilmek için tasıbdan sâlim ve azade olan
haqiqiy dine, hayal ve fantaziyalardan uzaq olan haqiqiy siyasiy
fırqalara nasıl qolını uzatıyursa, "Millet” gazetası de
kendi sahifelerinde yalıñız haqiqiy din hükümleri, haqiqiy
siyaset emelleri yaşatacaqdır.
Qırım gençligi şimdiye qadar
siyasiy ve ictimaiy hayatda nasıl yalıñız maqsadle, emel ile
oğraşa kelmiş ise, bugün onıñ müruc-ı efkârı olan "Millet”
gazetası sahifelerinde dahi şahsiyet haqqında hiç qalem
yürüdülmeyerek, ancaq haqiqatı meydana çıqarıcı fikir
mübarezesi yaşadılacaqdır.
Qırım gençliginiñ "Terciman”
efkârı olan "Millet” gazetasıniñ emellerinden biri de Qırımıñ
her qarış yeri aba ve icdadınıñ qanıyle yoğurıldığı, her
taşınıñ altında ceddleriniñ, dedeleriniñ, babalarınıñ
mezarı bulundığı halda topraqsızlıq yüzünden bir çoq
senelerden beri açlıqlar, sefaletler, yoqsızlıqlar ve
mahrumiyetler içinde çekişen qırımtatarına topraq aldırmaya ve
bu topraqlar üstünde bugünki kibi qansız, zayıf, faqır,
sararmış, solmaya yüz tutmış bir millet degil, belki qanlı,
canlı, diri, dınç, sağlam, nurlı, qaviy bir nesil yetişdirmeye
çalışmaqdır.
Bundan maada, "Millet” keçmişiniñ parlaq, şanlı
tarihından münasebet ve alâqası kesdirilmiş milletini şanlı
mazisiyle tanış itmek ve çoq zamandan beri kesilmiş bulunan
münasibet ve alâqasını tecdid eylemek için felyeton suretinde
edebiy, milliy hikâyeler, Qırım tarihına aid vesiqalar dahi derc
idecekdir.
Elhasıl, "Millet” mensüb oldığı milletiniñ tam
manasıyle bir millet olması için ne yapmaq lâzim ise onların
hepisini yapmaqdan keri durmayacaq. Milletiniñ her hususda
ilerileyüb yükselmesi, tekâmül ve teâli itmesine, şimdiye qadar
kendilerine hürmet itdigi başqa milletler tarafından kendisiniñ
de hürmet körmesine var quvetiyle çalışacaqdır.
Bütün bu işleri yapmaq, bütün bu
emelleri canlandurub yaşatmaq için "Millet”çilerin istinad
itdikleri, kendisine dayandıqları quvet ancaq milletdir. Bu halda
millet ve millete hıdmet için bugün Qırımın siyasiy bir
merkezinde siyaset ceryanları ve inqilâb dalğaları arasında
dünyaya kelen "Millet”in halq ve milletimiz tarafından hüsn-i
suretle qarşulanub büyük bir rağbetle oqunacağına hiç şübhe
itmeyurız. Çünki
"Millet” de, "Millet”çiler de, "Millet” matbaası da
milletiñdir.
Yaşasun "Millet”i yaşatacaq milletimiz!
|
