"Beşler
Soveti” teşkil olunğanından
beri bugüne kelinceye qadar siyaset barometrosı yeñi bir
tahavvülât qayd itmedi. Bugün aqd ictima itmesi muqarrar olan
"Umumdemokrat teşkilâtı vekilleri syezdi”-niñ ictimaina qadar
siyaset hevesatda mühim bir tebdilât vuqua kelmemesi tabiy bir hal
idi. Çünki bu bir buçuq haftalıq müddet, iki büyük işitçe
buhranı arasında keçen sükünet devrine müşabeh olmaq üzere.
İlk buhrannıñ doğurdığı aksülamel neticesinde yekdigerine zıt
iki quvetin hal mutavaata kelmeleri dimek oldığından bu keyfiyet
muhallef taraflar quvetleriniñ kendi dahiliy ameliyatları ile
meşğul olmalarından ve yeñiden vuqua kelecek müsademe qarşısında
kendi mevqileriniñ tahkimine çalışdıqlarından ileri
kelmekdedir. Sakin havadan soñra birden bire arz olan furtuna kibi,
bugün ahval-ı siyasiyede müşahede itdigimiz bu turğunlıq dahi
"Umumdemokrat teşkilâtiy vekilleri syezdi”-niñ aqd-ı ictimaa
başladığı daqiqadan itibaren tekrar şiddetli bir furtuna
şekilini alacaqdır. Bu syezd ile memleketimiz de burjuva sınıfları
arasında körilen muhallef diger ceryan arasında ğayet şiddetli
bir müsademe vuqua kelecegi şimdiden his olunıyur. Añlaşıldığına
köre, syezdde sair bütün ceryanlara ğalib kelecek fikir, "bugünki
künde muhtelit kabine prensibiniñ hal ve zemane muvaffıq olmadığı”
fikiridir. Merkeziy komitede sotsialist revolütsionerler
fraksiyasınıñ vuqua kelen ğalebelik bir ictimainde syezdin ne
kibi meseleleri hal idecegi meselesi müzakere idilmişdir. Bu
ictimaada syezdin programına dair qatiy bir qarar qabul idilmemiş
ise de, umum arasında müşahede olunan yekâne ceryan "muhtelit
kabine prensibi” aleyhindedir. Sosyal demokratların "Menşevik”
namını alan diger bir qısmınıñ fraksiyasında ise 15 muhallef
reye qarşı 18 muvaffıq rey ile şu qarar qabul idilmişdir:
Ehaliniñ
keniş sınıflarını temsil idebilecek bir hükümet teşkili ve
bu hükümetin mezkür sınıflar ögünde mesul
olması,
Hükümetin
demokrat sınfı teşkilâtına qarşı haiz olacağı mesuliyetin
muayen bir şekil ve qaideye rabtiy ve demokrat sınfiy teşkilâtı
ile hükümet arasında daimiy suretde mevcud olacaq münasebat için
bir şekil ve qaide tayinı.
Bu qararın ilk maddesinde sarahatan
olmasa bile zimnan
muhtelit kabine prensibine bir meyil körinmekdir. Lâkin bu qarar
mücibince teşkil olunacaq muhtelit bir kabine demokrat sınıfnıñ
sıqıy suretde kontroline tab olunacaq ve hükümet ile demokrat
sınıfı arasında tesir olunacaq daimiy münasebet sayesinde nüfüz
hükümetin bir qısmı her halda demokrat sınıfı teşkilâtınıñ
elinde olacaqdır. İşte bu demokrat fırqalarınıñ sağ cenahını
teşkil iden "menşevik”-lerin qararında bile idare-i hükümetin
demokratiya sınıfınıñ kontroli altında bulunması hususında
şiddetli bir ceryan körülmekdedir. Yuqarıda beyan olundığı
vechile "menşevikler” fırqasında bir qarar, 15 muhallef reye
qarşı 18 kişiden ibaret ğayet küçük bir ekseriyet ile qabul
olunmışdır. Keride qalan 15 muhallef rey ise bu qararın aleyhinde
olub, kendi talablarında sosiyalist revolüsiyonerler ve
bölşeviklerin qararına soñ derece yaqınlaşmaqdadır. Bu qarara
iştirak iden fraksiyalardan biri de
"internasionalist-menşevik”-lerdir.
"İnternasionalist-menşevik”ler ile "sotsial-demokrat
menşevik”lerin yuqarıda beyan olunan küçük bir ekseriyeti ve
sosyalist revolüsiyonerlerin dahi "Oboronets” namını alan
küçük bir qısımı istisna idilirse, demokrat sınıfın büyük
bir eksiriyeti halis demokratik bir hükümet teşkili ve yahud diger
bir tabirle demokrat sağı diktaturası tesisi tarafındadırlar.
Sotsialist firqlarınıñ demokrat sınfiy diktaturası aleyhinde
olan ğayet az bir qısmı ise muhtelit kabine prensibine meyil
itmekle beraber aynı zamanda muhtelit kabinetin sıqıy suretde
demokrat sınfiy teşkilâtı tarafından kontrol altına alınması
ve binaenaleyh nüfüz hükümetin qısıma, kabinetin de fevqinde
add olunacaq demokrat sınfiy teşkilâtınıñ elinde bulunmasını
talab itmektedirler. Bu qarar kösteriyur ki: sotsialist fırqalarınıñ
eñ sağ cenahı bile bundan bir-iki ay evelkine nizbetle soñ
vaqaların tesiri altında ziyadesiyle sollaşmışdır. Bu qarar
ameliy cehetine kelince diyebiliriz ki, kabine teşkilinde hükümet
üzerine demokrat sınıfiy teşkilâtınıñ kontroli vaz idilmek
suretiyle quvve-i hükümetin bir qısımı mezkür teşkilâta
virilirse, memleketimiz yekdigerinden ayrı iki hükümet qarşısında
qalmış olır. Bugüne qadar memleketimizde eksik olmayan gürilti
ve ihtilâfların baş sebebi de memleket dahilinde bugüne qadar
biri resmiy ve digeri ğayır resmiy olmaq üzere yekdigerinden ayırı
iki hükümetin mevcud olmasıdır. Eger bu vaqıta qadar başımıza
mesuliyet olan "iki hükümet” belâsı bu suretle yine halı
üzere qalacaq olursa, iki aradaki ihtilâflara bundan soñra da bir
nihayet virilmeyecegi kibi, quvetli bir hükümet teşkili dahi
evelki vecihle adem-i muvaffaqiyete oğrayacaqdır. Quvetli ve
yekcınsiy bir hükümet teşkil olunamadıqdan soñra, "demokrat
teşkilâtı vekilleri syezdi” dahi quri laqırdıdan başqa ameliy
cehetinden haiz qıymet bir iş işlemiş add olunamaz.
Bizim kendi itiqadımıza kelince,
"koalitsiya – muhtelit-i kabine” prensibi bugün qabul tatbiq
degildir. Tahmin itdigimize köre, syezdin eñ soñ qabul idecegi
qarar dahi bu şekilde olacaqdır. Çünki syezdde kooperativler
ittifaqı vekilleri ile menşeviklerin yuqarıda beyan olınan küçük
bir ekseriyetinden maada "muhtelit-i kabine” prensibine meyil
kösterecek diger bir unsur daha mevcud degildir. Şeher idareleri ve
zemstvolardan davet olunacaq vekillere kelince, şeher idareleri ve
zemstvo azaları henüz yaqınlarda eñ demokratik bir saylav usulı
intihab olunmış kişilerden ibaret oldıqlarından bunların dahi
syezdde, demokrat sınfınıñ eñ şiddetli temayülâtı aksi
itdireceklerini ümid idiyurız.
Syezdde mevzu bahs olması ihtimallı
olan meselelerden biri de sulh meselesidir. Syezdde eñ quvetli bir
fırqa teşkil idecek bölşevikler ile onların talablarına iştirak
itmiş olan sotsialist-revolütsionerlerin büyük bir qısmı
tarafından acele suretde sulh aqd olunması talab olundığı,
Petrograd asker ve amele vekilleri sovetniñ "Beşler Soveti”
teşkil olunmazdan bir kün evel hükümet-i muvaqqata taqdim
itdikleri talabnameden añlaşılmış idi. Sosiyal-demokrat ve
internasiyonalistlerin "menşevik” qısımı tarafından qabul
olunan qararda ise hükümetin beynelmilel temelli bir sulh aqdı
hususında büyük bir faaliyetle çalışması talab olunmaqdadır.
Her halda "demokrat teşkilâtı vekilleri syesdi”niñ hükümet
meselesinden maada sulh meselesini dahi bir yola qoyacağını ümid
idiyurız. Bugün aqd ictima itmesi muqarrar olan syezdin bu
meselelere dair ne kibi bir qarara kelecegi bir-iki künden daha
añlaşılacaqdır.