Майыс-6 Тепреч байрамы, даха догърусы  Теферрюдж байрамы  ферахланув, эгленюв байрамы демектир. Тюрк-татарларда та эскиден бери бу бахар байрамы сайылыр. Бу куньде халкъ чёллерге чыкъар, къалакъай тыгъырыр, дуалар этер, эгленир, ферахланыр эди. Бойлеликнен халкълар бахарнынъ кельмесине, табиатнынъ джанланмасына севинир, артыкъ энди бу сенесининъ берекети ичюн кузьде ве эрте бахарда сарф олунгъан эмекнинъ хайыры нетиджелерини истеп байрам япар эдилер. Бу куньге Хыдырлез (Хыдыр-Ильяс) куню дерлер ки, бунынле бу куннинъ шерефли бир кунь олмасы арзу этерек сёйленильсе керек.

Большевизм девринде бизим бу миллий байрам кунюмиз ерине «Бир майыс пролетар» байрамы япылыр ве тепречлер де о куньге уйдурылыр эди.

Эки йылдыр биз сербест омрюмизде Тепреч байрамымызны япмакъ шерефине наиль олдыкъ. Кечкен сенеге нисбетен бу сене бир даха тешкилятлы даха чокъ эмек сарф этип чёль, багъ-багъча арымыздан бол берекет беклемеге хакъ къазандыкъ.

…бу йыл тепреч куню шерефине япыладжакъ байрамларда  Дервизаларда, топлашувларда халкъымыз чалышмагъа бильгени киби, эгленмеге, ферахланмагъа да бильгенини, хэм де медений адамлар оларакъ байрам этмеге бильгенлерини косьтермелидирлер. Бу байрамдан макъсат  чевиклигимизни, беджериклигимизни косьтермек олгъаны киби, къомшу койлерден кельген мусафирлернен корюшюв, дертлешюв олмалыдыр. Къомшу койлерде ишлер не халда, чалышув насыл, не киби муваффакъиетлери бар, буларнынъ себеби недир, окъутув ишлери, тербие, ахлякъ меселелери не халда  буларыны сормакъ, огренмек, фикир пайлашмакъ керек, иште бойле отькерильген байрамдан биз файда ала билириз. Къырымда омюрге кечирильмекте олгъан янъы къурум бизден чалышкъыр, беджерикли, тербиели, мутереккий джемиет азалары олмамызны талап эте. Тенбель, ёлсуз, ахлякъсыз, джахиль кимселер бизим джемиетимизнинъ там хукъукълы азалары ола бильмезлер.

Бугунь «ишлер  тишлер» сёзи там ерине сёздир. Сачув ишлерини муваффакъиетнен эда койлюлеримизге хыдырлер кунюни ферах кечирмелерини темени этмекнен берабер, илериде даха да себатлы, даха тирнекли чалышмаларыны ве бол берекет эльде этмелерини теменни этемиз.